ایران کے قبضہ والے اسرائیلی جہاز پر سوار ایک ہندوستانی کی وطن واپسی، بقیہ 16 ہندوستانیوں کا انتظار
وزارت خارجہ کا کہنا ہے کہ تہران میں ہندوستانی مشن مال بردار جہاز ایم ایس سی ایریز کے باقی 16 ہندوستانی کرو ممبرس کے ساتھ رابطے میں ہے۔
گزشتہ دنوں اسرائیل کے جس مال بردار جہاز پر ایران نے قبضہ کیا تھا، اس میں سوار 17 ہندوستانی کرو ممبرس میں سے ایک کی آج ہندوستان واپسی ہو گئی۔ مال بردار کشتی ایم ایس سی ایریز پر سوار ہندوستانی پائلٹ ٹیم میں شامل کیرالہ کے تریشور کی رہنے والی خاتون کیڈیٹ این ٹیسا جوزف جمعرات کو کوچین پہنچیں۔ بوقت دوپہر کوچین بین الاقوامی ہوائی اڈہ پر ان کی بہ حفاظت واپسی ہوئی اور اس دوران خاتون کیڈیٹ کا استقبال مقامی پاسپورٹ افسر نے کیا۔ یہ جانکاری حکومت ہند کی وزارت خارجہ کے ذریعہ ویب سائٹ پر دی گئی ہے۔
وزارت خارجہ کی ویب سائٹ پر بتایا گیا ہے کہ تہران میں ہندوستانی مشن مال بردار جہاز ایم ایس سی ایریز کے باقی 16 ہندوستانی اہلکاروں کے ساتھ رابطے میں ہے۔ تہران میں ہندوستانی مشن ایم ایس سی ایریز کی پائلٹ ٹیم کے باقی اراکین کی خیریت کے لیے ایرانی افسران کے ساتھ بھی رابطے میں ہے۔
Great work, @India_in_Iran . Glad that Ms. Ann Tessa Joseph has reached home. #ModiKiGuarantee always delivers, at home or abroad. https://t.co/VxYMppcPZr
— Dr. S. Jaishankar (Modi Ka Parivar) (@DrSJaishankar) April 18, 2024
خاتون کیڈیٹ کی ہندوستان واپسی پر مرکزی وزیر خارجہ ڈاکٹر ایس جئے شنکر نے سوشل میڈیا پلیٹ فارم پر ایک پوسٹ کر خوشی کا اظہار کیا ہے۔ انھوں نے اپنے پوسٹ میں لکھا ہے کہ ’’ایران میں ہندوستانی سفارت خانہ نے بہت اچھا کام کیا ہے۔ مجھے یہ جان کر خوشی ہو رہی ہے کہ این ٹیسا جوزف گھر لوٹ آئی ہیں۔ مودی کی گارنٹی ہر بار پوری کی جاتی ہے، پھر چاہے گھر ہو یا بیرون ملک۔‘‘
واضح رہے کہ ایران اور اسرائیل کے درمیان کشیدگی بڑھتی جا رہی ہے۔ گزشتہ دنوں ایران کے جس اسرائیلی جہاز کو اپنے قبضے میں لیا، اس پر 25 کرو ممبرس تھے جن میں 17 کا تعلق ہندوستان سے ہے۔ 17 ہندوستانی کرو ممبرس میں سے ایک کی وطن واپسی ہو چکی ہے اور 16 کی واپسی کا ہنوز انتظار ہے۔ بتایا جا رہا ہے کہ پائلٹ ٹیم کے سبھی اراکین پوری طرح سے صحت مند ہیں اور انھیں کسی طرح کی دقت کا سامنا نہیں ہے۔