ہندوستان میں آئندہ 5 سالوں کے دوران توانائی شعبہ میں 67 ارب ڈالر کی سرمایہ کاری ہوگی: پی ایم مودی
گوا میں ایک تقریب سے خطاب کرتے ہوئے پی ایم مودی نے کہا کہ ہندوستانی معیشت 7.5 فیصد کی شرح سے بڑھ رہی ہے، ہندوستان دنیا کی سب سے تیز ترقی کرنے والی معیشت ہے اور ہم اسی رفتار سے آگے بڑھیں گے۔
وزیر اعظم نریندر مودی نے اس وقت گوا دورہ پر ہیں۔ وہاں منگل کے روز ایک تقریب سے خطاب کرتے ہوئے انھوں نے کہا کہ ہندوستان میں آئندہ پانچ سے چھ سالوں کے دوران توانائی شعبہ میں تقریباً 67 ارب ڈالر کی سرمایہ کاری ہوگی۔ اپنے خطاب میں وزیر اعظم نے عالمی سرمایہ کاروں کو ہندوستان کی ترقی کی داستان کا حصہ بننے کے لیے مدعو بھی کیا۔
The coming times belong to green energy and India is poised for leadership in this sector too. pic.twitter.com/mq2YwU0EG4
— Narendra Modi (@narendramodi) February 6, 2024
6 فروری کو پی ایم مودی نے گوا میں انڈیا انرجی ویک کے دوسرے ایڈیشن کا افتتاح کیا۔ اس کے بعد اپنی تقریر کے دوران انھوں نے کہا کہ ’’ہندوستانی معیشت 7.5 فیصد کی شرح سے بڑھ رہی ہے۔ ہندوستان دنیا کی سب سے تیزی سے بڑھنے والی معیشت ہے اور حال ہی میں آئی ایم ایف نے اندازہ ظاہر کیا ہے کہ ہم اسی رفتار سے آگے بڑھیں گے۔ ملک جلد ہی دنیا کی تیسری سب سے بڑی معیشت بن جائے گا۔‘‘ وزیر اعظم نے اس دوران عالمی کپنیوں کو ہندوستان کے توانائی شعبہ کی ترقی کا حصہ بننے کے لیے مدعو کرتے ہوئے کہا کہ ’’ملک کو 2030 تک اپنی ریفائننگ صلاحیت 254 ایم ایم ٹی پی اے (ملین میٹرک ٹن سالانہ) سے بڑھا کر 450 ایم ایم ٹی پی اے کرنے کی امید ہے۔‘‘
The world is looking to invest in India in the oil, gas and energy sectors. pic.twitter.com/Ng6sFjq2tK
— Narendra Modi (@narendramodi) February 6, 2024
وزیر اعظم نے اپنی تقریر میں توانائی شعبہ میں سرمایہ کاری کا تذکرہ کرتے ہوئے کہا کہ ’’ہندوستان توانائی سیکٹر میں غیر معمولی سرمایہ کاری کر رہا ہے، جو پہلے کبھی نہیں ہوا۔ آئندہ پانچ چھ سالوں میں ہندوستان میں توانائی سیکٹر میں 67 ارب ڈالر کی سرمایہ کاری ہونے جا رہی ہے۔‘‘ انھوں نے مزید کہا کہ ’’بڑھتی توانائی ضرورتوں کے درمیان ہندوستان میں سبھی کو سستی توانائی مہیا کرائی جا رہی ہے۔ ہندوستان ایسا ملک ہے جہاں کئی عالمی حادثات کے باوجود گزشتہ دو سالوں سے پٹرول اور ڈیزل کی قیمتیں کم ہوئی ہیں۔‘‘