مہنگائی پر کھڑگے کا مودی حکومت پر حملہ، طنزیہ کارٹون شیئر کر کے بھی اٹھائے سوال
ملکارجن کھڑگے نے مہنگائی کے معاملے پر مودی حکومت کو نشانہ بناتے ہوئے اشیائے ضروریہ کی قیمتوں میں اضافے کے اعداد و شمار پیش کیے اور ایک طنزیہ کارٹون بھی شیئر کیا
نئی دہلی: کانگریس صدر ملکارجن کھڑگے نے ملک میں بڑھتی مہنگائی کو لے کر وزیر اعظم نریندر مودی کی قیادت والی مرکزی حکومت پر سخت حملہ کیا ہے۔ انہوں نے الزام لگایا کہ 2014 میں مہنگائی کم کرنے کا وعدہ کرنے والی حکومت کے دور میں عام آدمی کی مشکلات مسلسل بڑھ رہی ہیں۔ کھڑگے نے اشیائے ضروریہ کی قیمتوں میں اضافے کے اعداد و شمار پیش کرنے کے ساتھ ایک طنزیہ کارٹون بھی شیئر کیا، جس کے ذریعے مہنگائی کے باعث عام لوگوں پر پڑنے والے بوجھ کو اجاگر کیا گیا ہے۔
ملکارجن کھڑگے نے سوشل میڈیا پلیٹ فارم ایکس پر اپنی پوسٹ میں لکھا کہ مودی حکومت کے 12 سال میں مہنگائی کی مار سے عوام بے حال ہیں۔ وزیر اعظم نے مہنگائی کم کرنے کا وعدہ کیا تھا، لیکن آج صورت حال یہ ہے کہ عام آدمی کی تھالی چھوٹی ہو رہی ہے، جیب خالی ہو رہی ہے اور گھر چلانا مشکل ہوتا جا رہا ہے۔
انہوں نے 2014 اور 2026 کی قیمتوں کا موازنہ کرتے ہوئے بتایا کہ آٹے کی قیمت 21 روپے سے بڑھ کر 69 روپے فی کلو ہو گئی ہے۔ ارہر کی دال 75 روپے سے 180 روپے، سرسوں کا تیل 102 روپے سے 263 روپے اور دودھ 36 روپے سے بڑھ کر 85 روپے تک پہنچ گیا ہے۔ اسی طرح چاول کی قیمت بھی 29 روپے سے بڑھ کر 71 روپے ہو گئی ہے۔
کانگریس صدر نے مہنگائی کی شرح کا حوالہ دیتے ہوئے دعویٰ کیا کہ اکتوبر میں غذائی مہنگائی 8.94 فیصد اور تھوک مہنگائی 12.29 فیصد تک پہنچ گئی۔ انہوں نے ایک سروے کے نتائج کا حوالہ دیتے ہوئے کہا کہ 61 فیصد خاندانوں کے گھریلو ضروریات پر ماہانہ اخراجات گزشتہ سال کے مقابلے میں 20 فیصد سے زیادہ بڑھ گئے ہیں، جبکہ 74 فیصد لوگوں کو اپنے غیر ضروری اخراجات میں کٹوتی کرنی پڑ رہی ہے۔
کھڑگے نے اپنی پوسٹ کے ساتھ ایک سیاہ و سفید طنزیہ کارٹون بھی شیئر کیا ہے۔ اس کارٹون میں ایک شخص کو کپڑوں اور دیگر سامان کے ساتھ دکھایا گیا ہے، جبکہ سامنے کھڑا ایک کمزور شخص مہنگائی کی علامت بنے لباس میں نظر آتا ہے۔ کارٹون کے ذریعے قیمتوں میں اضافے اور عام آدمی کی مشکلات پر طنز کیا گیا ہے۔ اس کے نیچے معروف کارٹونسٹ آر کے لکشمن سے متاثر ہونے کا ذکر بھی درج ہے۔
मोदी सरकार के 12 साल, महँगाई की मार, जनता लाचार!
— Mallikarjun Kharge (@kharge) November 18, 2026
मोदी जी ने महँगाई कम करने का वादा किया था, लेकिन आज हालात ये हैं कि आम आदमी की थाली छोटी हो रही है, जेब खाली हो रही है और घर चलाना मुश्किल होता जा रहा है।
2014 में महँगाई कम करने का वादा, 2026 में जनता की जेब पर डाका -
▪️ आटा:… pic.twitter.com/M2hMRp0CAQ
ملکارجن کھڑگے نے وزیر اعظم مودی کو مخاطب کرتے ہوئے کہا کہ ملک کی ترقی کا پیمانہ ان کے خطابات کی طوالت نہیں بلکہ یہ ہونا چاہیے کہ عام آدمی کی تھالی میں کتنا کھانا ہے اور اس کی جیب میں کتنی کمائی بچ رہی ہے۔ انہوں نے سوال کیا کہ آخر عوام کب تک حکومت کی معاشی بدانتظامی کی قیمت چکاتے رہیں گے؟ کانگریس صدر کی یہ پوسٹ مہنگائی کے مسئلے پر مرکزی حکومت کے خلاف ان کی تنقید کا حصہ ہے۔