محمد سراج کو پلیئنگ الیون میں جگہ نہ دیے جانے سے کرکٹ برادری حیران، گواسکر سے لے کر سہواگ تک نے کی سلیکٹرس کی تنقید
ہرشا بھوگلے نے سوشل میڈیا پلیٹ فارم ’ایکس‘ پر لکھا کہ ’’ہندوستان کی جانب سے سراج کو ٹیم سے باہر رکھنے پر میں حیران اور مایوس ہوں۔ انہوں نے ہر وہ ذمہ داری بخوبی نبھائی ہے جو انہیں سونپی گئی۔‘‘
نیوزی لینڈ کے خلاف 2 ٹیسٹ میچوں کی سیریز کے پہلے مقابلے میں ہندوستانی ٹیم نے تیز گیندباز محمد سراج اور آل راؤنڈر رویندر جڈیجہ کو پلیئنگ الیون میں شامل نہیں کیا ہے۔ حتمی الیون میں جسپریت بمراہ، آکاش دیپ، انشل کمبوج اور پرسدھ کرشنا کو تیز گیندباز کے طور پر شامل کیا گیا ہے اور واشنگٹن سندر کو بطور آل راؤنڈر شامل کیا گیا ہے۔ محمد سراج کو پلیئنگ الیون میں شامل نہ کیے جانے پر روی شاستری، سنیل گواسکر، ہرشا بھوگلے، وریندر سہواگ اور جتن سپرو کا سخت ردعمل سامنے آیا ہے۔
’انڈین اسپورٹس نیٹورک‘ نے اپنے ’ایکس‘ ہینڈل پر روی شاستری کا بیان پوسٹ کیا ہے۔ سابق کرکٹر نے پلیئنگ الیون میں محمد سراج اور رویندر جڈیجہ کو شامل نہ کیے جانے پر کہا کہ ’’یہ ٹیم کا انتہائی ناقص انتخاب ہے۔ محمد سراج بہترین گیند بازوں میں سے ایک ہیں۔ انگلینڈ میں اتنی شاندار کارکردگی کا مظاہرہ کرنے، کام کا اتنا زیادہ بوجھ اٹھانے اور ہندوستان کے بہترین گیند باز ثابت ہونے کے بعد انہیں نیوزی لینڈ کے خلاف ٹیم سے باہر رکھنا میری سمجھ سے بالکل باہر ہے۔‘‘ ساتھ ہی انہوں نے کہا کہ ’’اسی طرح رویندر جڈیجہ جیسے عالمی معیار کے آل راؤنڈر کو باہر رکھنے اور ان کی جگہ واشنگٹن سندر کو کھلانے کا فیصلہ بھی میری سمجھ سے باہر ہے۔ میری رائے میں محمد سراج اور رویندر جڈیجہ دونوں کو پہلے ٹیسٹ میں ضرور کھیلنا چاہیے تھا۔ ٹیم انڈیا کا یہ فیصلہ واقعی انتہائی خراب ہے۔‘‘
Ravi Shastri slams India's team selection after Ravindra Jadeja and Mohammed Siraj were dropped from the first Test against New Zealand.
— lndian Sports Network (@IS_Netwrk29) November 18, 2026
Ravi Shastri Said ️:
"This is absolutely terrible team selection. Mohammed Siraj is one of the best bowlers, and after delivering… pic.twitter.com/wf1SMb5rs8
’سونی اسپورٹس‘ سے بات کرتے ہوئے سنیل گواسکر نے واضح طور پر کہا کہ مجھے پوری امید تھی کہ سراج اس ٹیسٹ سیریز میں کھیلیں گے لیکن پلیئنگ الیون میں ان کا نام نہ دیکھ کر کافی حیرت ہوئی۔ ہندوستانی ٹیم مینجمنٹ کا یہ فیصلہ میرے لیے کافی حیران کرنے والا ہے۔ میرا ماننا ہے کہ سراج کو باہر رکھنے کی کوئی معقول وجہ سمجھ نہیں آتی ہے، کیونکہ ان کی فارم کے حوالے سے کوئی تشویش نہیں تھی۔ سنیل گواسکر نے کہا کہ ’’جب انہیں پانچویں ونڈے میں کھلایا گیا تو مجھے لگا کہ سراج ٹیسٹ میں بھی کھلیں گے، لیکن یہ حیران کرنے والا فیصلہ ہے۔ مجھے نہیں لگتا ہے کہ انہوں نے ہندوستانی ٹیم کو کبھی مایوس کیا ہے۔‘‘
Sunil Gavaskar slams India's decision to leave Mohammed Siraj out of the Playing XI for the first Test against New Zealand.
— CricTracker (@Cricketracker) November 19, 2026
[Miohammed Siraj, Sunil Gavaskar, New Zealand, India, NZvsIND, Cricket, CricTracker] pic.twitter.com/CjeQC0lycj
معروف کمنٹیٹر ہرشا بھوگلے نے سوشل میڈیا پلیٹ فارم ’ایکس‘ پر لکھا کہ ’’ہندوستان کی جانب سے سراج کو ٹیم سے باہر رکھنے پر میں حیران اور مایوس ہوں۔ انہوں نے ہر وہ ذمہ داری بخوبی نبھائی ہے جو انہیں سونپی گئی۔ بمراہ کی غیر موجودگی میں انہوں نے بولنگ اٹیک کی ذمہ داری سنبھالی اور ایک بہترین اور مثبت سوچ رکھنے والے ٹیم پلیئر ثابت ہوئے۔ آپ کو کمبوج کے لیے نیک خواہشات کا اظہار کرنا چاہیے، لیکن مجھے امید ہے کہ سراج کے ساتھ اس معاملے پر کھل کر اور ایمانداری سے بات چیت کی جائے گی۔‘‘
Flabbergasted and disappointed that India have left out Siraj. He has done everything asked of him, lifted the attack in the absence of Bumrah, been a great, positive team player. You have to wish Kamboj well but I hope there are some very honest conversations with Siraj taking…
— Harsha Bhogle (@bhogleharsha) November 18, 2026
’انڈین اسپورٹس نیٹورک‘ نے اپنے ’ایکس‘ ہینڈل پر سہواگ کا بیان بھی پوسٹ کیا ہے۔ سابق سلامی بلے باز کا کہنا ہے کہ ’’نیوزی لینڈ کے خلاف پلیئنگ الیون میں محمد سراج کا نام نہ دیکھ کر حیرت ہوئی، خاص طور پر انگلینڈ سیریز میں ان کی شاندار کارکردگی کے بعد۔ وہ ہندوستان کے سب سے نمایاں گیند باز رہے اور یقیناً ٹیم میں جگہ کے مستحق تھے۔ ہندوستان کے ہر گیند باز میں اچھی کارکردگی دکھانے کی صلاحیت ہے، لیکن حالیہ کارکردگی کی بنیاد پر سراج ٹیم میں جگہ کے مضبوط دعویدار تھے۔ سچ کہوں تو میری رائے میں آج محمد سراج کو نہ کھلانا سلیکشن کا انتہائی خراب فیصلہ ہے۔‘‘
Virender Sehwag is angry over Mohammed Siraj being dropped from Team India's Playing XI.
— lndian Sports Network (@IS_Netwrk29) November 19, 2026
Virendar Sehwag Said ️:
"It's surprising to see Mohammed Siraj missing from the Playing XI against New Zealand, especially after the outstanding performance he delivered in the… pic.twitter.com/XMypOZqKMI
کمنٹیٹر جتن سپرو نے بھی محمد سراج کو پلیئنگ الیون میں شامل نہ کرنے پر حیرت کا اظہار کیا ہے۔ انہوں نے ’ایکس‘ پر لکھا کہ ’’تیز ہواؤں، پچ پر گھاس کی موجودگی، بیٹنگ کی گہرائی وغیرہ کو بنیاد بنا کر اس فیصلے کے حق میں دلائل دیے جا سکتے ہیں۔ امید ہے کہ نتیجہ ہندوستان کے حق میں رہے گا، لیکن اس کے باوجود یہ یقین کرنا بہت مشکل ہوگا کہ محمد سراج کو پلیئنگ الیون سے باہر کر دیا گیا۔ خاص طور پر بمراہ کی غیر موجودگی میں انہوں نے ہر طرح کے حالات میں دلیرانہ انداز میں ٹیم کے لیے جدوجہد کی ہے!!‘‘
Arguments can be made about windy conditions, green top, batting depth etc etc. Hopefully the result will be in India’s favour. But it would still be very hard to believe Mohammad Siraj was dropped from the XI. Lion hearted efforts in all conditions especially in Bumrah’s…
— Jatin Sapru (@jatinsapru) November 18, 2026