بلقیس بانو اور انصاف کی ٹمٹماتی روشنی!... شاہ رخ عالم

بلقیس اور ان کے خاندان پر حملہ صرف اس لیے کیا گیا تھا کہ وہ مسلمان تھے۔ بلقیس کے جسم کو فرقہ وارانہ انتقام لینے اور ہندو یاتریوں کی موت کا بدلہ چکانے کے لیے استعمال کیا گیا۔

بلقیس بانو اور انصاف کی ٹمٹماتی روشنی!... شاہ رخ عالم

سپریم کورٹ کے ضابطوں کے مطابق سزا کے خلاف اپیل میں کسی بنچ کے سامنے مقدمہ فہرست بند ہونے سے پہلے ہی ’خود سپردگی کا سرٹیفکیٹ‘ جمع کرانا لازمی ہے۔ اگر مجرم نے خود سپردگی نہیں کی ہے تو اسے اس کی ٹھوس وجہ بتانی ہوتی ہے اور باقاعدہ چھوٹ طلب کرنی پڑتی ہے، جو سنگین جرائم کے معاملات میں آسانی سے نہیں ملتی۔

فوجداری اپیلوں کو عدالت کی جانب سے سماعت کے لیے قبول کیے جانے کے بعد بھی ان پر فیصلہ آنے میں طویل وقت لگ جاتا ہے۔ مجرم جیل میں چند سال کی سزا کاٹنے کے بعد سزا پر روک لگوانے کے لیے واپس آتا ہے۔ وہ فریاد کرتا ہے کہ اس کی اپیل زیر التوا ہے اور وہ جیل میں 3-2 سال گزار چکا ہے۔ عدالتیں اکثر براہ راست کہہ سکتی ہیں کہ ’ایک سال بعد دوبارہ آنا۔‘

یہاں ایک عجیب تضاد نظر آتا ہے۔ عدالت نے اپیل میں اتنا دم پایا کہ اسے غور و خوض کے لیے قبول کر لیا، لیکن وہ یہ بھی جانتی ہے کہ مقدمات کے بھاری بیک لاگ کو دیکھتے ہوئے اگر اپیل زیر التوا رہنے کے دوران مجرم کو ابتدا ہی میں رہا کر دیا گیا تو آخرکار قصوروار ثابت ہونے پر شاید اسے انصاف کے کٹہرے میں لانا ممکن نہ ہو۔ اسی لیے عدالتوں نے سزا دینے کا ایک غیر رسمی اور صوابدیدی طریقہ اختیار کر لیا ہے۔ یہ ایسے عدالتی نظام کا ایک سمجھوتہ ہے جو مقدمات کے فوری فیصلے کی ضمانت نہیں دے سکتا۔ یہاں انتظار کو ہی سزا بنا دیا جاتا ہے۔

عدالت کی جانب سے رہا کیے جانے سے پہلے جیل میں کتنا وقت گزارنا کافی سمجھا جائے اور کن زمروں کے جرائم میں یہ اصول نافذ ہو، اس کا فیصلہ مختلف جج اپنے اپنے صوابدیدی اختیار سے کرتے ہیں۔ بلقیس بانو کے معاملے میں قصوروار قرار دیے گئے حملہ آوروں نے 17 سال کی سزا کاٹی تھی اور عام طور پر اسے رہائی کے لیے کافی وقت سمجھا جا سکتا ہے۔ خواہ اس بات کا پورا امکان برقرار رہے کہ رہا کیے گئے مجرموں کی زندگی میں ان کی اپیل پر فیصلہ ہی نہ ہو پائے۔ لیکن کیا عدالت نے اس معاملے میں ’سزا کی کافی مدت‘ کا تعین کرتے وقت جرم کی سنگین نوعیت کو بھی پیش نظر رکھا؟

عدالتیں بعض معاملات میں جیل میں گزارے گئے برسوں کے مقابلے میں جرم کی نوعیت کو ضرور ترجیح دیتی ہیں۔ مثال کے طور پر، خصوصی دہشت گردی قوانین کے تحت عمر قید کی سزا کاٹ رہے ایسے کئی افراد ہیں۔ ان میں سے بعض کو انتہائی معمولی کردار ادا کرنے پر قصوروار ٹھہرایا گیا تھا، جیسے وہ نوعمر لڑکا جو ایک ٹرک پر کلینر کا کام کرتا تھا، جس سے غیر قانونی ہتھیار برآمد ہوئے تھے۔ اب وہ ادھیڑ عمر ہو چکا ہے اور جیل میں تقریباً 24 سال کی سزا کاٹ چکا ہے۔

ایسے لوگ بھی ہیں جنہوں نے جیل میں 20 سے 32 سال گزارے ہیں اور ان کے پاس سپریم کورٹ میں اپنی سزا کے خلاف اپیل کرنے کے وسائل تک نہیں ہیں۔ جب وہ اپنی سزا کاٹ رہے ہوتے ہیں، اس وقت بھی سزا میں تخفیف (ریمیژن) یا پیرول کے لیے ان کی درخواستیں باقاعدگی سے مسترد کر دی جاتی ہیں۔ سزا پر نظرثانی کرنے والے بورڈ تخفیف کی درخواستوں کو میکانکی انداز میں مسترد کر دیتے ہیں، لیکن دہشت گردی مخالف قوانین سے متعلق معاملات میں عدالتیں جرم کی نوعیت یا پہلے ہی کاٹی جا چکی سزا کے برسوں کی پروا کیے بغیر مداخلت نہ کرنے کو ہی ترجیح دیتی ہیں۔

عمر خالد اور شرجیل امام 6 سال سے زیادہ عرصہ جیل میں گزار چکے ہیں اور عدالتوں نے استغاثہ کے غیر ثابت شدہ الزامات کو بھی قبول کیا ہے، لیکن ان کی ضمانت کی درخواستیں مسلسل عدالتوں میں ایک سخت دیوار سے ٹکرا کر واپس آ رہی ہیں۔ چارج شیٹ میں یو اے پی اے جیسے سخت دہشت گردی مخالف قانون کو شامل کیا جانا عدالتوں کو یہ منمانا دائرہ اختیار دے دیتا ہے۔ عدالتیں اکثر ریاست اور استغاثہ کو جرم کی سنگینی طے کرنے یا اسی بنیاد پر جیل سے رہائی دینے یا درخواست مسترد کرنے کے لیے خصوصی قوانین کا منمانا استعمال کرنے کی پوری چھوٹ دے دیتی ہیں۔

بلقیس کے معاملے کو ایک الگ تھلگ مجرمانہ واقعہ کے طور پر پیش کیا گیا ہے، جو اپنی انتہائی سفاکیت کے اعتبار سے غیر معمولی تو ہے ہی، لیکن یہ صرف اتنا ہی نہیں تھا۔ ہتھیاروں سے لیس مردوں سے بھری 2 جیپوں نے بھاگ رہے مسلمانوں کے ایک گروہ کو گھیر لیا، جس میں 5 ماہ کی حاملہ بلقیس بانو، ان کی چچازاد بہن (جس نے 2 دن قبل ہی بچے کو جنم دیا تھا)، چھوٹے بچے اور دیگر بزرگ مرد و خواتین شامل تھے۔ بلقیس اور حال ہی میں ماں بننے والی ان کی بہن کے ساتھ اجتماعی عصمت دری کی گئی۔ نوزائیدہ بچے کو مار ڈالا گیا اور بلقیس کی 3 سالہ بیٹی کا بھی قتل کر دیا گیا۔ اس بچی کو ماں کی گود سے زبردستی چھینا گیا اور اس کا سر پتھر پر دے مارا گیا۔ بلقیس کی بہنوں، چچازاد بہنوں اور ان کی ماں کو ان کی آنکھوں کے سامنے قتل کر دیا گیا۔ وہ خود بے ہوش ہو گئیں اور شاید انہیں مردہ سمجھ کر چھوڑ دیا گیا۔

یہ لوگ مسلمانوں کے خلاف پرتشدد جنون برپا کیے ہوئے تھے، کیونکہ ان کا ماننا تھا کہ گودھرا میں ہندو یاتریوں کو لے جا رہی سابرمتی ایکسپریس ٹرین میں آگ فرقہ وارانہ ارادے سے لگائی گئی تھی۔ ’بدلہ‘ لینے نکلی بھیڑ نے ہر اس مسلمان کو نشانہ بنایا جو اس کے ہاتھ لگا اور لوٹ مار، عصمت دری اور قتل و غارت گری کا ایسا سلسلہ شروع کیا جو گجرات میں 3 دنوں تک بلا روک ٹوک جاری رہا۔ بلقیس اور ان کے خاندان پر حملہ صرف اس لیے کیا گیا تھا کہ وہ مسلمان تھے۔ بلقیس کے جسم کو فرقہ وارانہ انتقام لینے اور ہندو یاتریوں کی موت کا بدلہ چکانے کے لیے استعمال کیا گیا۔ یہ بھیانک جرم کوئی اکیلا واقعہ نہیں تھا، بلکہ مسلمانوں کو نشانہ بنا کر چلائی گئی ایک منظم نفرت انگیز مہم کا حصہ تھا۔ یہ 2002 کے گجرات فسادات کی ایک بڑی سازش کا حصہ تھا۔ وہ تشدد سیاسی محرکات کے تحت کیا گیا تھا اور اس میں بے خوفی سے کھلی چھوٹ ملنے کا احساس بھی شامل تھا۔ ریاستی انتظامیہ، پولیس اور دیگر افسران اس میں پوری طرح ملوث تھے۔