’کہاں ہے لال آنکھ؟‘ چینی ملٹری ایئرکرافٹ کے ہندوستانی سرحد میں داخل ہونے کی خبر پر کانگریس کا پی ایم مودی سے تلخ سوال
پون کھیڑا نے پوچھا کہ ’’کیا قومی سلامتی کے معاملے میں اس حکومت کا ماننا ہے کہ عوام کو جاننے کا کوئی حق نہیں؟ یا ملک کو اندھیرے میں رکھنا ہی اقتدار میں بنے رہنے کا اس کا واحد طریقہ بن گیا ہے؟‘‘
چینی ملٹری ایئرکرافٹ کے ہندوستانی سرحد میں داخل ہونے اور مسلسل تنبیہوں کے باوجود دیر تک ہندوستانی علاقہ سے باہر نہ نکلنے کی خبر نے ایک بار پھر قومی سلامتی سے متعلق کئی طرح کے اندیشے پیدا کر دیے ہیں۔ انگریزی میڈیا ادارہ ’آؤٹ لک‘ کی خبر سامنے آنے کے بعد کانگریس نے خاص طور سے وزیر اعظم نریندر مودی اور مرکزی حکومت کو تنقید کا نشانہ بنایا ہے۔ کانگریس نے سوشل میڈیا پلیٹ فارم ’ایکس‘ پر کئی پوسٹ جاری کر اپنی فکر کا اظہار بھی کیا ہے۔
चीन की नापाक हरकत
— Congress (@INCIndia) November 14, 2026
12 नवंबर की सुबह चीन का मिलिट्री एयरक्राफ्ट हमारी सीमा में घुस आया और सिक्किम के ऊपर करीब 20 मिनट तक घूमता रहा।
खास बात है कि वायुसेना की चेतावनियों को भी चीन के मिलिट्री एयरक्राफ्ट ने अनसुना किया।
ये बेहद चिंताजनक खबर है। मोदी सरकार को इसे लेकर चीन से… pic.twitter.com/7MPJhQggK4
کانگریس نے ’آؤٹ لک‘ کی خبر کا اسکرین شاٹ شیئر کرتے ہوئے ایک سوشل میڈیا پوسٹ میں لکھا ہے کہ ’’چین کی ناپاک حرکت... 12 نومبر کی صبح چین کا ملٹری ایئرکرافٹ ہماری سرحد میں داخل ہو گیا اور سکم کے اوپر تقریباً 20 منٹ تک گھومتا رہا۔ خاص بات یہ ہے کہ فضائیہ کی تنبیہوں کو بھی چین کے ملٹری ایئرکرافٹ نے نظر انداز کر دیا۔‘‘ آگے یہ بھی لکھا گیا ہے کہ ’’یہ بے حد فکر انگیز خبر ہے۔ مودی حکومت کو اس معاملہ پر چین کے سامنے سخت اعتراض درج کرانا چاہیے۔ امید ہے نریندر مودی اس بار چین کو کلین چٹ نہیں دیں گے۔‘‘
नरेंद्र मोदी, कहां है 'लाल आंख'? pic.twitter.com/VvXVh36SkL
— Congress (@INCIndia) November 14, 2026
ایک دیگر سوشل میڈیا پوسٹ میں کانگریس نے ہندوستان کی سرحد میں چین کی 2 مداخلتوں کی ویڈیو پیش کی ہے، اور اس کا کیپشن دیا ہے ’نریندر مودی، کہاں ہے لال آنکھ؟‘ ایک ویڈیو میں اروناچل پردیش کا واقعہ بتایا گیا ہے جہاں کچھ دنوں قبل چین نے ہندوستان کے اندر 6 سے 7 کلو میٹر گھس کر ٹینٹ لگا لیے۔ دوسرا تازہ واقعہ سکم کا ہے جہاں چینی ملٹری ایئرکرافٹ بے خوف انداز میں 20 منٹ تک گھومتا دکھائی دیا۔ کانگریس کا کہنا ہے کہ پہلے چین نے زمین سے دراندازی کی، اور اب آسمان میں سیندھ لگا دی۔ انہی واقعات کو سامنے رکھتے ہوئے کانگریس نے سوال کیا ہے کہ ’’چین کو لال آنکھ کب دکھائیں گے مودی؟‘‘
One disturbing revelation after another is exposing the state of affairs in this country. And once again, it is the media, not the government, bringing the truth to light.
— Pawan Khera ಪವನ್ ಖೇರಾ (@Pawankhera) November 14, 2026
This time, Chinese aircraft reportedly crossed into Sikkim and hovered for nearly 20 minutes.
Yet, neither… https://t.co/aENKpw8vla
اس معاملہ میں کانگریس رکن پارلیمنٹ پون کھیڑا نے بھی اپنا سخت رد عمل ظاہر کیا ہے۔ انھوں نے ’ایکس‘ پر جاری اپنی پوسٹ میں لکھا ہے کہ ’’یکے بعد دیگرے تشویش ناک انکشافات اس ملک کے حالات کی حقیقت کو بے نقاب کر رہے ہیں۔ ایک بار پھر سچائی سامنے لانے کا کام حکومت نہیں بلکہ میڈیا کر رہا ہے۔‘‘ وہ مزید لکھتے ہیں کہ ’’اس بار اطلاعات کے مطابق چینی طیاروں نے سکم کی فضائی حدود میں داخل ہو کر تقریباً 20 منٹ تک پرواز کی۔ اس کے باوجود نہ تو مودی اور نہ ہی وزیر دفاع راجناتھ سنگھ نے ہندوستانی عوام کو اس بارے میں بتانا ضروری سمجھا۔‘‘ وہ یہ سوال بھی کرتے ہیں کہ ’’کیا قومی سلامتی کے معاملے میں اس حکومت کا ماننا ہے کہ عوام کو سچائی جاننے کا کوئی حق نہیں؟ یا ملک کو اندھیرے میں رکھنا ہی اقتدار میں بنے رہنے کا اس کا واحد طریقہ بن گیا ہے؟‘‘