نیوزی لینڈ کے ہاتھوں ہندوستان کو 244 رنز سے شکست، ون ڈے کرکٹ میں دوسری سب سے بڑی ہار
نیوزی لینڈ نے چوتھے ون ڈے میں ہندوستان کو 244 رنز سے شکست دے دی۔ 334 رنز کے ہدف کے تعاقب میں ہندوستانی ٹیم محض 89 رنز پر سمٹ گئی، جبکہ میٹ ہنری نے چھ وکٹیں حاصل کیں
Through RSS Feeds 
ماؤنٹ ماؤنگانوئی: نیوزی لینڈ نے شاندار کارکردگی کا مظاہرہ کرتے ہوئے چوتھے ون ڈے مقابلے میں ہندوستان کو 244 رنز کے بڑے فرق سے شکست دے دی۔ 334 رنز کے ہدف کے تعاقب میں ہندوستانی بلے بازوں کی پوری ٹیم محض 89 رنز پر ڈھیر ہوگئی۔ رنز کے اعتبار سے یہ ون ڈے کرکٹ میں ہندوستان کی دوسری سب سے بڑی شکست ہے۔ دوسری جانب نیوزی لینڈ نے 50 اوور کے فارمیٹ میں اپنی دوسری سب سے بڑی جیت درج کی۔
ہدف کے تعاقب میں ہندوستانی ٹیم کی شروعات انتہائی مایوس کن رہی۔ نیوزی لینڈ کے تیز گیند باز میٹ ہنری نے اننگز کے پہلے ہی اوور میں ہندوستان کے تین اہم بلے بازوں وراٹ کوہلی، روہت شرما اور شریاس ایر کو بغیر کوئی رن بنائے پویلین واپس بھیج دیا۔ اس تباہ کن آغاز کے بعد ہندوستانی ٹیم سنبھل نہ سکی۔ رتوراج گائیکواڑ بھی محض پانچ رنز بنا کر کائل جیمیسن کا شکار ہوگئے۔
ایشان کشن نے 27 رنز بنا کر کچھ مزاحمت کی، جبکہ اکشر پٹیل نے 21 رنز اسکور کیے۔ نمن دھیر نے بھی 21 رنز بنائے۔ تاہم باقی بلے باز نیوزی لینڈ کے گیند بازوں کا مقابلہ کرنے میں ناکام رہے۔ عاقب نبی پانچ اور کلدیپ یادو ایک رن بنا کر آؤٹ ہوئے۔
نیوزی لینڈ کی جانب سے میٹ ہنری نے تباہ کن گیند بازی کرتے ہوئے 9.4 اوور میں 27 رنز دے کر چھ وکٹیں حاصل کیں۔ میتھیو فشر نے بھی عمدہ کارکردگی کا مظاہرہ کرتے ہوئے 31 رنز کے عوض تین کھلاڑیوں کو آؤٹ کیا۔ ہنری ون ڈے کرکٹ میں ہندوستان کے خلاف ایک میچ میں چھ وکٹیں حاصل کرنے والے نیوزی لینڈ کے محض دوسرے گیند باز بن گئے ہیں۔ ان سے قبل شین بانڈ نے 2005 میں یہ کارنامہ انجام دیا تھا۔
اس سے قبل نیوزی لینڈ کی ٹیم پہلے بیٹنگ کرتے ہوئے 50 اوور میں 333 رنز بنا کر آؤٹ ہوگئی تھی۔ ٹیم کی جانب سے ول ینگ نے شاندار سنچری اسکور کی۔ انہوں نے 108 گیندوں کا سامنا کرتے ہوئے 125 رنز بنائے۔
ٹم سیفرٹ نے 48 گیندوں میں 58 رنز کی اننگز کھیلی، جبکہ فن ایلن نے 30 گیندوں پر 41 رنز بنائے۔ مچل سینٹنر نے 24 رنز کا تعاون دیا۔
ہندوستان کی جانب سے گیند بازی میں اکشر پٹیل، عاقب نبی اور گرنور برار نے دو، دو وکٹیں حاصل کیں، جبکہ ارشدیپ سنگھ اور نمن دھیر نے ایک، ایک کھلاڑی کو آؤٹ کیا۔ نیوزی لینڈ کی متوازن بیٹنگ اور میٹ ہنری کی غیر معمولی گیند بازی نے مقابلے کو یک طرفہ بنا دیا اور ہندوستانی ٹیم کو ون ڈے تاریخ کی بڑی شکستوں میں سے ایک کا سامنا کرنا پڑا۔
