مسلمانوں سے متعلق پی ایم مودی کے بیان پر کانگریس ناراض، الیکشن کمیشن سے کی 17 شکایتیں، کارروائی کا مطالبہ

ابھیشیک منو سنگھوی، سلمان خورشید اور گردیپ سنگھ سپل پر مشتمل کانگریس کے ایک وفد نے الیکشن کمیشن سے ملاقات کی اور پی ایم مودی کے خلاف شکایات اس کے سامنے رکھی۔

Through RSS Feeds Through RSS Feeds
اپریل 22, 2024 - 20:23
0 0
مسلمانوں سے متعلق پی ایم مودی کے بیان پر کانگریس ناراض، الیکشن کمیشن سے کی 17 شکایتیں، کارروائی کا مطالبہ

راجستھان کے بانسواڑہ میں مسلمانوں کے تعلق سے دیئے گئے پی ایم مودی کے بیان کی ہر سطح پر مذمت ہو رہی ہے۔ سوشل میڈیا پر تو لوگوں کا اس کے خلاف زبردست غصہ پھوٹ پڑا ہے۔ اسی درمیان کانگریس پارٹی نے پی ایم مودی کے خلاف الیکشن کمیشن میں شکایت درج کراتے ہوئے ان کے خلاف کاروائی کا مطالبہ کیا ہے۔

واضح رہے کہ وزیر اعظم نریندر مودی نے اتوار (21 اپریل) کو راجستھان کے بانسواڑہ میں ایک انتخابی جلسے سے خطاب کرتے ہوئے کہا تھا کہ اگر کانگریس اقتدار میں آئی تو وہ لوگوں کی املاک کو مسلمانوں میں بانٹ دے گی۔ کانگریس نے پی ایم مودی کے اس بیان کو مذہبی منافرت پھیلانے والا نیز انتخابی ضابطۂ اخلاق کی صریح خلاف ورزی بتاتے ہوئے الیکشن کمیشن سے شکات کی ہے۔ اس ضمن میں ابھیشیک منو سنگھوی، سلمان خورشید اور گردیپ سنگھ سپل پر مشتمل کانگریس کے ایک وفد نے الیکشن کمیشن سے ملاقات کی اور اپنی باتیں ان کے سامنے رکھیں۔ اس موقع پر وفد نے 17 شکایات پر مشتمل ایک میمورنڈم بھی الیکشن کمیشن کو سونپا، جس میں 5 شکایتیں اہم ہیں۔

کانگریس کے اس وفد کےذریعے الیکشن کمیشن میں شکایت درج کرانے کے علاوہ کانگریس کے قومی صدر ملکارجن کھڑگے نے بھی پی ایم مودی پر سخت حملہ کیا ہے۔ سوشل میڈیا پلیٹ فارم ’ایکس‘ پر انہوں نے کہا ہے کہ ’’آج مودی جی کی بوکھلاہٹ ان کی تقریر سے ظاہر ہوئی کہ پہلے مرحلے کے نتیجوں میں انڈیا جیت رہی ہے۔ مودی جی نے جو کچھ کہا وہ یقیناً نفرت انگیز تو ہے ہی، توجہ ہٹانے کی ایک سوچی سمجھی چال بھی ہے۔ وزیر اعظم نے آج وہی کیا جو انہیں سنگھ کے سنسکاروں (اقدار) سے ملا ہے۔ اقتدار کے لیے جھوٹ بولنا، باتوں کو غلط پیرائے پیش کرتے ہوئے مخالفین پر جھوٹے الزامات عائد کرنا یہ سنگھ اور بی جے پی کی تربیت کی خصوصیت ہے۔‘‘

کانگریس کے قومی صدر نے اپنی پوسٹ میں مزید لکھا ہے کہ ’’ملک کے 140 کروڑ لوگ اب اس جھوٹ کے شکار نہیں ہوں گے۔ ہمارا منشور ہر ہندوستانی کے لیے ہے۔ سب کی برابری کی بات کرتا ہے۔ سب کے لیے انصاف کی بات کرتا ہے۔ کانگریس کا ’نیائے پتر‘ سچائی کی بنیاد پر قائم ہے۔ ہندوستان کی تاریخ میں کسی بھی وزیر اعظم نے اپنے عہدے کے وقار کو اتنا نہیں گرایا جتنا مودی جی نے گرایا ہے۔‘‘

واضح رہے کہ سماجوادی پارٹی کے سربراہ اکھیلش یادو نے بھی پی ایم مودی کے مسلمانوں سے متعلق بیان کی سخت مذمت کی ہے۔ انہوں نے سوشل میڈیا ’ایکس‘ پر پوسٹ کرتے ہوئے دیگر باتوں کے علاوہ یہ بھی کہا ہے کہ کسی خاص کمیونٹی کے بارے میں نام لے کر غلط باتیں کہنا پوری دنیا میں پھیلی ہوئی اس کمیونٹی کی توہین ہے۔ بین الاقوامی سطح پر اس سے ملک کے سیکولر اور جمہوری تشخص کو بہت نقصان پہنچا ہے۔ یہ ایک انتہائی قابل اعتراض بیان ہے، جس کی کوئی معافی تک نہیں ہوسکتی۔

Read More