بنگلہ دیش: گارمنٹ مزدوروں کا احتجاج، درجنوں فیکٹریاں غیر معینہ مدت کے لیے بند

بنگلہ دیش کے غازی پور میں گارمنٹ مزدوروں کا احتجاج جاری ہے۔ مظاہرین نے ڈھاکہ-میمن سنگھ شاہراہ جام کردی، جب کہ احتجاج اور کشیدگی کے باعث درجنوں فیکٹریاں غیر معینہ مدت کے لیے بند کردی گئی ہیں

بنگلہ دیش: گارمنٹ مزدوروں کا احتجاج، درجنوں فیکٹریاں غیر معینہ مدت کے لیے بند

ڈھاکہ: بنگلہ دیش کے شہر غازی پور میں گارمنٹ فیکٹریوں کے مزدوروں کا احتجاج بدھ کو بھی جاری رہا۔ مظاہرین نے ایک بار پھر ڈھاکہ-میمن سنگھ شاہراہ کو جام کردیا، جس کے باعث ٹریفک کی آمد و رفت مکمل طور پر متاثر ہوئی۔ احتجاج کے پیش نظر درجنوں فیکٹریاں غیر معینہ مدت کے لیے بند کردی گئی ہیں۔

مقامی میڈیا کی رپورٹ کے مطابق، غازی پور شہر کے چھایدانہ علاقے میں واقع متعدد گارمنٹ فیکٹریوں کے مزدور بدھ کی صبح تقریباً 9 بج کر 45 منٹ پر چھایدانہ اور ہری کین کے قریب شاہراہ پر جمع ہوگئے اور اسے بند کردیا۔ اس کے نتیجے میں سڑک پر ٹریفک کا نظام درہم برہم ہوگیا اور مسافروں کو شدید پریشانی کا سامنا کرنا پڑا۔

بنگلہ دیشی اخبار ’ڈھاکہ ٹریبیون‘ کے مطابق، باگھیر بازار میں واقع گولڈن ریفٹ گارمنٹس، سری پور کے نوتون بازار علاقے میں ایس ایم نٹ ویئر اور بھوانی پور میں فکیرا گارمنٹس کے مزدوروں نے کام بند کردیا۔ ان فیکٹریوں کے ملازمین اپنے اپنے کارخانوں کے اندر پرامن طریقے سے دھرنے پر بیٹھے رہے۔ اس کے علاوہ کوناباری کی دو دیگر گارمنٹ فیکٹریوں کے مزدوروں نے بھی احتجاج کیا۔

غازی پور صنعتی علاقے کے پولیس سپرنٹنڈنٹ امجد حسین نے بتایا کہ حالات کو قابو میں لانے کی کوششیں جاری ہیں۔ ان کے مطابق، منگل کو موصول ہونے والی رپورٹ کے تحت 10 فیکٹریوں نے بدھ کے روز تعطیل کا اعلان کیا تھا، جب کہ 39 فیکٹریاں غیر معینہ مدت کے لیے بند کردی گئی ہیں۔

واضح رہے کہ منگل کو بھی غازی پور کے متعدد علاقوں میں مزدوروں نے احتجاج کیا تھا۔ ان علاقوں میں چاندنا چوراستہ، جارون، ناؤجور، چھایدانہ، کوناباری، کاشیم پور، بھوگرا اور آپدا شامل ہیں۔ اس دوران مظاہرین اور سکیورٹی اہلکاروں کے درمیان جھڑپیں بھی ہوئیں۔ مظاہرین نے اینٹ اور پتھراؤ کیا، جب کہ پولیس نے انہیں منتشر کرنے کے لیے آنسو گیس کے گولے داغے اور ساؤنڈ گرینیڈ استعمال کیے۔ ان واقعات میں پولیس اہلکاروں، گارمنٹ مزدوروں اور صحافیوں سمیت متعدد افراد زخمی ہوگئے۔

حالات مزید خراب ہونے سے روکنے کے لیے حکام نے منگل کو غازی پور کی 70 فیکٹریاں بند کرنے کا حکم دیا تھا۔ اس سے قبل پیر کو بھی کوناباری علاقے میں اے بی ایم فیشن اور جمیونا نامی دو گارمنٹ فیکٹریوں کے مزدوروں نے اپنے کام کی جگہوں کے باہر جمع ہوکر احتجاج کیا تھا اور کوناباری-کاشیم پور سڑک کو جام کردیا تھا۔

اطلاع ملنے پر پولیس اور بارڈر گارڈ بنگلہ دیش (بی جی بی) کے اہلکار موقع پر پہنچے اور مزدوروں سے سڑک خالی کرنے کو کہا۔ تاہم، مظاہرین کے مشتعل ہونے پر پولیس نے آنسو گیس اور ساؤنڈ گرینیڈ کا استعمال کیا، جس کے بعد مزدور منتشر ہو گئے اور حالات معمول پر آ گئے۔