’کانگریس حکومت عوام کی مدد کر رہی اور پی ایم مودی روزی-روٹی چھین رہے‘، کھڑگے کا مرکز پر حملہ
تقریب میں پہنچی زبردست بھیڑ سے خوش کانگریس صدر نے چھتیس گڑھ کی کانگریس حکومت کی خوب تعریف کی، انھوں نے کہا کہ یہ بھروسے کے اظہار کی تقریب ہے۔
Through RSS Feeds 
نئی دہلی: کانگریس صدر ملکارجن کھڑگے نے آج وزیر اعظم نریندر مودی کو جھوٹوں کا سردار قرار دیا۔ بدھ کے روز چھتیس گڑھ کے رائے گڑھ میں منعقد ایک جلسہ سے خطاب کرتے ہوئے کھڑگے نے کہا کہ ’’پی ایم مودی ہمیشہ جھوٹ بولتے ہیں۔ کانگریس حکومت لوگوں کی مدد کر رہی ہے اور دوسری طرف وزیر اعظم مودی لوگوں کی روزی روٹی چھین رہے ہیں۔‘‘ انھوں نے مزید کہا کہ ’’پی ایم مودی کی گارنٹی زیادہ سے زیادہ لوگوں کو بے روزگار رکھنے، جی ایس ٹی بڑھانے اور عوام کو پریشان کرنے کی ہے۔ چھتیس گڑھ کے مفاد عامہ کے منصوبوں کے لیے پی ایم مودی کو چھتیس گڑھ کی کانگریس حکومت کی تعریف کرنی چاہیے، لیکن مودی صرف کانگریس حکومت کو کوستے ہیں۔‘‘
LIVE: Congress President Shri @Kharge's address at 'Bharose Ka Sammelan' in Raigarh, Chhattisgarh. https://t.co/M4LvM60CTu
— Congress (@INCIndia) October 4, 2023
تقریب میں پہنچی زبردست بھیڑ سے خوش کانگریس صدر نے چھتیس گڑھ کی کانگریس حکومت کی خوب تعریف کی۔ انھوں نے کہا کہ یہ بھروسے کے اظہار کی تقریب ہے۔ کانگریس حکومت نے برعکس حالات میں بھی چھتیس گڑھ کی ترقی کے کام کو کبھی نہیں روکا۔ چھتیس گڑھ میں آج ہر طرف ترقی ہو رہی ہے۔ گئو دھن یوجنا سے لوگوں کو مضبوطی ملی ہے۔ چھتیس گڑھ مین پانچ سالوں میں ایک لاکھ 75 ہزار کروڑ روپے ڈائریکٹ بینفٹ کے ذریعہ عوام کو دیے گئے ہیں۔ پانچ سالوں میں 40 لاکھ سے زیادہ لوگ غریبی سے باہر آئے ہیں۔ چھتیس گڑھ کے لوگوں کی آمدنی 38 فیصد بڑھ گئی ہے۔ راشن کارڈ کی تعداد بھی بڑھی ہے۔ کانگریس حکومت نے طے کردہ پیمانہ سے بھی زیادہ دھان کی خریداری کی ہے۔ پی ایم مودی کو یہ سب برداشت نہیں ہو رہا ہے۔ وہ چھتیس گڑھ آ کر جل، جنگل، زمین کے بارے میں کوئی بات نہیں کرتے، وہ صرف چھتیس گڑھ حکومت کی برائی کرتے ہیں۔
