جنتر منتر کے احتجاجی مقام کی حیثیت ختم کرنے کا معاملہ، سپریم کورٹ میں سماعت ملتوی
سپریم کورٹ نے جنتر منتر کے احتجاجی مقام کی حیثیت ختم کرنے سے متعلق معاملے کی سماعت ملتوی کر دی۔ عدالت نے عرضی گزار کو جوابی حلف نامہ داخل کرنے کے لیے ایک ہفتے کی مہلت دی
نئی دہلی: سپریم کورٹ میں جنتر منتر کے احتجاجی مقام کی حیثیت ختم کرنے سے متعلق معاملے کی سماعت جمعہ کو ملتوی کر دی گئی۔ عدالت نے عرضی گزار کو جوابی حلف نامہ داخل کرنے کے لیے ایک ہفتے کی مہلت دیتے ہوئے معاملے کی سماعت آئندہ تاریخ تک کے لیے ملتوی کر دی۔
سماعت کے دوران سالیسٹر جنرل تشار مہتا نے عرضی گزار کی جانب سے سرکولیٹ کی گئی تحریری دلیلوں میں شامل بعض حقائق پر سوال اٹھائے۔ انہوں نے کہا کہ تحریری دلیلوں میں پیش کیے گئے حقائق کی صداقت کی ذمہ داری کسی نہ کسی کو قبول کرنی ہوگی۔
عرضی گزار کی جانب سے پیش ہونے والی سینئر وکیل مکتا گپتا نے عدالت کو بتایا کہ انہوں نے اس معاملے میں اپنی تحریری دلیلیں سرکولیٹ کی ہیں۔ اس پر بنچ نے کہا کہ تحریری دلیلیں آج ہی موصول ہوئی ہیں اور ان میں کئی حقائق سے متعلق باتیں شامل ہیں۔ عدالت نے واضح کیا کہ ایسے حقائق کو حلف نامے کے ذریعے عدالتی ریکارڈ پر لانا ضروری ہے۔
اس پر مکتا گپتا نے وضاحت کرتے ہوئے کہا کہ ان کی تحریری دلیلوں میں کوئی حقائق پر مبنی دعویٰ نہیں کیا گیا ہے، بلکہ ان میں قانونی نکات پیش کیے گئے ہیں۔ انہوں نے بتایا کہ تحریری جواب میں اس معاملے سے متعلق پہلے دیے گئے عدالتی فیصلوں اور قانون کی تشریح سے جڑے پہلوؤں کو شامل کیا گیا ہے۔
سماعت کے دوران سالیسٹر جنرل تشار مہتا نے ایک خط کے حوالے سے بھی وضاحت پیش کی۔ انہوں نے عدالت کو بتایا کہ اس معاملے میں پہلے پیش ہونے والے وکیل راجو کو کچھ نجی خاندانی پریشانیوں کا سامنا تھا۔ چونکہ مختلف مقدمات میں ان کا نام وکیل کے طور پر درج تھا، اس لیے ان تمام معاملات میں خطوط سرکولیٹ کیے گئے تھے۔
تشار مہتا نے بتایا کہ بعد میں جب انہیں معلوم ہوا کہ وکیل راجو اس معاملے میں عدالت کی معاونت کر رہے ہیں تو انہوں نے متعلقہ خط واپس لینے کی درخواست کی تھی۔
سالیسٹر جنرل نے ایک بار پھر اس بات پر زور دیا کہ تحریری جواب یا ریپلائی داخل کرنے والے شخص کو اس میں شامل حقائق کی ذمہ داری قبول کرنی چاہیے۔ ان کا کہنا تھا کہ تحریری دلیلوں میں حقائق پیش کیے جانے کی صورت میں ان کی صداقت کی جواب دہی بھی ضروری ہے۔
عدالت نے دونوں فریقوں کے دلائل سننے کے بعد عرضی گزار کو جوابی حلف نامہ داخل کرنے کے لیے ایک ہفتے کا وقت دیا اور سماعت ملتوی کر دی۔