ہندوستان نے چوتھے ٹیسٹ میں انگلینڈ کو 5 وکٹ سے شکست دے کر سیریز پر کیا قبضہ، جوریل پلیئر آف دی میچ قرار
ہندوستان کو جیت کے لیے دوسری اننگ میں 192 رن بنانے تھے، ایک وقت ہندوستان کا اسکور 5 وکٹ پر 120 رن ہو گیا تھا اور ٹیم مشکل میں تھی، لیکن گل-جوریل کی ناٹ آؤٹ 72 رنوں کی شراکت داری سے جیت مل گئی۔
Through RSS Feeds 
ہندوستان اور انگلینڈ کے درمیان 5 ٹیسٹ میچوں کی سیریز کا چوتھا ٹیسٹ میچ آج ہندوستان نے 5 وکٹ سے جیت لیا۔ اس جیت کے ساتھ ہی ہندوستان نے سیریز میں نہ صرف 1-3 کی سبقت بنا لی ہے، بلکہ اس سیریز پر قبضہ بھی کر لیا ہے۔ ایک وقت ہندوستانی ٹیم مشکل میں نظر آ رہی تھی جب 120 رن پر 5 وکٹ گر گئے تھے اور جیت کے لیے 72 رن باقی تھے۔ ایسے میں شبھمن گل (ناٹ آؤٹ 52 رن) اور دھرو جوریل (ناٹ آؤٹ 39 رن) نے مزید کوئی نقصان نہیں ہونے دیا اور ٹیم کو جیت کی دہلیز کے پار پہنچا دیا۔
A fantastic victory in Ranchi for #TeamIndia
— BCCI (@BCCI) February 26, 2024
India clinch the series 3⃣-1⃣ with the final Test to be played in Dharamsala
Scorecard ▶️ https://t.co/FUbQ3MhXfH#INDvENG | @IDFCFIRSTBank pic.twitter.com/5I7rENrl5d
آج چوتھے ٹیسٹ میچ کا چوتھا دن شروع ہوا تو ہندوستان کا اسکور بغیر کسی نقصان کے 40 رن تھا، یعنی دوسری اننگ میں ضروری 192 رن میں سے 152 رن بنانے کی ضرورت تھی۔ کپتان روہت شرما اور یشسوی جیسوال نے ہندوستان کو بہترین شروعات دی اور اس شراکت داری کو 84 رن پر پہنچایا تھا جب جو روٹ نے یشسوی جیسوال کو اینڈرس کے ہاتھوں کیچ آؤٹ کرا دیا۔ یشسوی نے 44 گیندوں پر 37 رن بنائے۔ اس کے بعد روہت شرما نے 81 گیندوں پر 55 رنوں کی شاندار اننگ کھیلی جنھیں ٹام ہارٹلی نے اسٹمپ آؤٹ کرا دیا۔ پھر رجت پاٹیدار بغیر کوئی رن بنائے آؤٹ ہو گئے اور اس کے بعد رویندر جڈیجہ و شبھمن گل کے درمیان بھی محض 20 رنوں کی ہی شراکت داری ہوئی۔ جڈیجہ 4 رن بنا کر آؤٹ ہوئے اور سرفراز خان بھی پہلی ہی گیند پر شعیب بشیر کا شکار بن گئے۔ اس طرح ہندوستان کے 5 وکٹ 120 رن پر گر گئے اور ٹیم مشکل میں دکھائی دینے لگی۔
