مہاراشٹر: نواب ملک کی اجیت پوار سے ’دوستی‘ پر برسراقتدار اتحاد میں ہلچل، بی جے پی کا اظہارِ ناراضگی
مہاراشٹر کے نائب وزیر اعلیٰ دیویندر فڑنویس نے اجیت پوار کو خط لکھ کر نواب ملک کے شیوسینا (شندے گروپ)-بی جے پی-این سی پی (اجیت پوار گروپ) اتحاد میں شرکت کی مخالفت کی ہے۔
Through RSS Feeds 
مہاراشٹر کے سابق وزیر نواب ملک کے اجیت پوار کی قیادت والے این سی پی گروپ میں شامل ہونے کی خبر نے مہاراشٹر کی سیاست میں ہلچل مچا دی ہے۔ حالات کچھ ایسے بن گئے ہیں کہ ریاست میں برسراقتدار اتحاد شیوسینا (شندے گروپ)-بی جے پی-این سی پی (اجیت پوار گروپ) یعنی ’مہایوتی اتحاد‘ میں ہنگامہ پیدا ہو گیا ہے۔ بی جے پی لیڈر اور مہاراشٹر کے نائب وزیر اعلیٰ دیویندر فڑنویس نے اجیت پوار کو خط لکھ کر ملک کو مہایوتی اتحاد میں شامل کرنے کی مخالفت کی ہے۔
دیویندر فڑنویس نے اپنے ہم منصب اجیت پوار کو ایک خط لکھ کر نواب ملک کے شیوسینا-بی جے پی-این سی پی اتحاد میں شامل کیے جانے پر اعتراض ظاہر کرتے ہوئے کہا ہے کہ وہ جس طرح کے الزامات کا سامنا کر رہے ہیں، اسے دیکھتے ہوئے انھیں مہایوتی اتحاد میں شامل کرنا مناسب نہیں۔
Maharashtra Deputy CM Devendra Fadnavis writes to NCP leader Ajit Pawar to not include NCP leader Nawab Malik in the 'Mahayuti' (grand alliance) pic.twitter.com/5NQtNrabdw
— ANI (@ANI) December 7, 2023
فڑنویس نے اپنے خط میں لکھا ہے کہ ایک رکن اسمبلی کے طور پر ایوان میں حاضری نواب ملک کا حق ہے اور انھوں نے جمعرات کو کارروائی میں حصہ بھی لیا۔ اس ایشو پر اپنے اعتراضات پر فڑنویس نے شروع میں ہی واضح کر دیا کہ ان کے ذہن میں نواب ملک کے خلاف کوئی ذاتی دشمنی یا رنجش نہیں ہے۔ لیکن ان کے اوپر جس طرح کے الزامات لگے ہیں، انھیں دیکھتے ہوئے اتحاد میں شامل کرنا مناسب نہیں ہوگا۔
مبینہ منی لانڈرنگ معاملے میں 18 ماہ تک جیل میں رہے مہاراشٹر کے سابق وزیر نواب ملک آج نائب وزیر اعلیٰ اجیت پوار کی قیادت والے این سی پی گروپ میں شامل ہو گئے۔ جمعرات کی صبح نواب ملک مہاراشٹر قانون سازیہ کے سرمائی اجلاس کے لیے ناگپور گئے اور وِدھان بھون احاطہ میں اجیت پوار کے گروپ میں شامل ہو گئے۔ اسے این سی پی پر دعوے کی لڑائی میں مصروف شرد پوار کے لیے ایک زبردست جھٹکا مانا جا رہا ہے، کیونکہ نواب ملک ان کے بے حد قریبی لیڈروں میں سے ایک تھے۔
