عالمی کپ سے ٹھیک پہلے ہندوستانی ٹیم میں بڑی تبدیلی کا اعلان، اکشر پٹیل ہوئے باہر
بی سی سی آئی نے عالمی کپ کے لیے اعلان کردہ اسکواڈ سے اکشر پٹیل کو آؤٹ کر دیا ہے، ایشیا کپ کے دوران وہ زخمی ہوئے تھے اور اب تک صحت یاب نہیں ہو سکے ہیں، ان کی جگہ اشون اسکواڈ کا حصہ بن گئے ہیں۔
Through RSS Feeds 
عالمی کپ 2023 شروع ہونے سے پہلے ٹورنامنٹ میں شامل ہونے والی ٹیموں کے لیے آج آخری دن ہے جب وہ اپنے اپنے اعلان کردہ اسکواڈ میں تبدیلی کر سکتے ہیں۔ اس کا فائدہ اٹھاتے ہوئے ہندوستانی ٹیم مینجمنٹ اور بی سی سی آئی نے عالمی کپ کے لیے اپنے اسکواڈ میں اہم تبدیلی کا اعلان کیا ہے۔ اکشر پٹیل کو اسکواڈ سے باہر کیا گیا ہے اور ان کی جگہ روی چندرن اشون کو اسکواڈ کا حصہ بنایا گیا ہے۔
دراصل اکشر پٹیل کو ایشیا کپ کے دوران چوٹ لگی تھی اور اب تک وہ صحت یاب نہیں ہو سکے ہیں۔ ان کی غیر موجودگی میں روی چندرن اشون کو آسٹریلیا کے خلاف کھیلی گئی تین میچوں کی سیریز کے شروعاتی دو میچوں میں کھیلنے کا موقع ملا تھا۔ دونوں میچوں میں انھوں نے اپنی گیندبازی سے کافی متاثر کیا، اور اس کا نتیجہ ہے کہ وہ عالمی کپ کے لیے منتخب 15 رکنی ہندوستانی ٹیم کا حصہ بن گئے ہیں۔
آئی سی سی نے سوشل میڈیا پوسٹ کے ذریعہ ٹیم میں کی گئی تبدیلی سے متعلق تصدیق کر دی ہے۔ اشون ہفتہ کے روز انگلینڈ کے خلاف عالمی کپ سے قبل پریکٹس میچ سے قبل ٹریننگ کے لیے گواہاٹی میں ہندوستانی ٹیم کے ساتھ پہنچ بھی گئے ہیں۔ گواہاٹی میں ٹیم کے ساتھ ان کی موجودگی اور اکشر پٹیل کی غیر حاضری سے پہلے ہی اندازہ لگایا جا رہا تھا کہ اکشر کی جگہ اشون کو ٹیم کا حصہ بنایا جا سکتا ہے۔
