عالمی کپ 2023: دفاعی چمپئن انگلینڈ کو ملی پہلی جیت، بنگلہ دیش کو 137 رنوں سے ہرایا
انگلینڈ نے بنگلہ دیش کے سامنے جیت کے لیے 365 رنوں کا پہاڑ جیسا ہدف رکھا تھا، بڑے اسکور کے دباؤ کے سامنے بنگلہ دیشی ٹیم شروع میں ہی لڑکھڑا گئی اور بڑی مشکل سے 227 رن ہی بنا سکی۔
Through RSS Feeds 
کرکٹ عالمی کپ 2023 کے افتتاحی میچ میں نیوزی لینڈ کے ہاتھوں بری طرح شکست کھانے والی انگلش ٹیم نے آج اپنے دوسرے میچ میں زبردست واپسی کرتے ہوئے بنگلہ دیش کو 137 رنوں کے بڑے فرق سے ہرا دیا۔ دفاعی چمپئن انگلینڈ کو جب افغانستانی کپتان شکیب الحسن نے ٹاس جیتنے کے بعد بلے بازی کی دعوت دی تو پھر انگلش بلے بازوں نے پیچھے مڑ کر دیکھا تک نہیں۔ سلامی بلے بازوں جانی بیرسٹو اور ڈیوڈ ملان نے زبردست شروعات دیتے ہوئے پہلے وکٹ کے لیے 115 رنوں کی شراکت داری کی۔ جانی بیرسٹو 52 رن بنا کر آؤٹ ہوئے تو میدان میں جو روٹ آئے۔ انھوں نے بھی ڈیوڈ ملان کا بھرپور ساتھ دیا اور تیزی کے ساتھ دونوں نے رن بنانے کا سلسلہ جاری رکھا۔
England step up in Dharamsala to garner their first #CWC23 win ⚡#ENGvBAN : https://t.co/DIx6z6HF4n pic.twitter.com/NmXFDkWjaQ
— ICC (@ICC) October 10, 2023
انگلینڈ کا اسکور 400 کی طرف بہ آسانی بڑھتا ہوا دکھائی دے رہا تھا، لیکن 38ویں اوور کی دوسری گیند پر ڈیوڈ ملان بنگلہ دیشی اسپنر مہدی حسن کی گیند پر بولڈ ہو گئے۔ لیکن اس وقت تک وہ انفرادی طور پر 107 گیندوں میں تیز طرار 140 رن بنا چکے تھے اور ٹیم کا اسکور 266 تھا۔ اس کے بعد آنے والے بازوں نے مایوس کیا، کیونکہ آخر کے 10 اوورس میں 70 رن بھی نہیں بنے اور 6 وکٹ گر گئے۔ جو روٹ 82 رن بنا کر آؤٹ ہوئے اور کپتان جوس بٹلر 20 رن، ہیری بروک 20 رن، سیم کرن 11 رن، کرس ووکس 14 رن، عادل رشید 11 رن کا ہی تعاون دے سکے۔ لیونگسٹن نے مایوس کیا جو بغیر کوئی رن بنائے پویلین لوٹ گئے۔ 50 اوورس میں انگلینڈ کی ٹیم 9 وکٹ کے نقصان پر 364 رن بنا سکی۔ حالانکہ یہ اسکور بھی بنگلہ دیش کے لیے پہاڑ سے کم نہیں تھا۔
