دہلی کے کلیانپوری میں سہ منزلہ زیر تعمیر عمارت زمیں دوز، علاقہ میں افرا تفری، ویڈیو وائرل
کلیانپوری کے بلاک-15 میں جو عمارت منہدم ہوئی ہے وہاں مکان مالک وید پرکاش اپنے دو بھائیوں اور ماں کے ساتھ رہتے ہیں، انھوں نے بتایا کہ یہ سہ منزلہ مکان 22.5 گز کا ہے۔
Through RSS Feeds 
دہلی کے کلیانپوری علاقہ میں اس وقت افرا تفری کا ماحول پیدا ہو گیا جب ایک زیر تعمیر سہ منزلہ عمارت دیکھتے ہی دیکھتے زمیں دوز ہو گئی۔ اس حادثہ کی ویڈیو تیزی کے ساتھ سوشل میڈیا پر وائرل ہو رہی ہے۔ اچھی خبر یہ ہے کہ اس واقعہ میں کوئی جانی نقصان نہیں ہوا ہے۔
कल्याणपुरी में जमींदोज हुई निर्माणाधीन तीन मंजिला इमारत pic.twitter.com/paIwyJX3u4
— POOJA TRIPATHI (@shalki_pj) April 20, 2024
وائرل ہو رہی ویڈیو میں دیکھا جا سکتا ہے کہ جب عمارت زمیں دوز ہوئی تو لوگ جان بچا کر اِدھر اُدھر بھاگنے لگے۔ معاملہ کلیانپوری کے بلاک-15 کا ہے اور اس مکان کے مالک وید پرکاش ہیں۔ وہ یہاں اپنے دو بھائیوں اور ماں کے ساتھ رہتے ہیں۔ انھوں نے بتایا کہ سہ منزلہ مکان 22.5 گز کا ہے۔ ان کا کہنا ہے کہ پی ڈبلیو ڈی کی طرف سے ایک نالہ بنایا جا رہا ہے جس کی کھدائی کے سبب یہ حادثہ ہوا۔ وید پرکاش کے مطابق انھوں نے اس کھدائی کی مخالفت کی تھی اور کہا تھا کہ 8 سے 9 فٹ گڈھا کرنے پر مکان کو نقصان پہنچ سکتا ہے، لیکن ان کی بات نہیں سنی گئی۔
وید پرکاش کا کہنا ہے کہ ہفتہ کے روز تقریباً تین بجے مکان کے پیچھے سے چٹکنے کی کچھ آواز آئی تو انھوں نے فوراً پولیس کو خبر دی۔ پولیس نے چاروں طرف کی دکانوں اور مکانوں کو خالی کرانے کے بعد بیریکیڈنگ کر دی تھی۔ بریکیڈنگ کرنے کے ایک گھنٹہ کے اندر مکان دیکھتے ہی دیکھتے منہدم ہو گیا۔ اب اس کے اندر رکھا سامان بھی ملبہ میں تبدیل ہو چکا ہے۔
