’جب تک تینوں بھائی باہر نہیں آئیں گے، کوئی جشن نہیں منائے گا‘، سنجے سنگھ کی ضمانت پر بیوی انیتا کا بیان

انیتا سنگھ نے اپنے شوہر سنجے سنگھ کی ضمانت کے بعد کہا کہ ابھی یہ جدوجہد بہت طویل ہے، جب تک تینوں بھائی (کیجریوال، سسودیا، ستیندر جین) جیل سے باہر نہیں آتے، تب تک ہم کوئی جشن نہیں منائیں گے۔

Through RSS Feeds Through RSS Feeds
اپریل 2, 2024 - 20:18
0 0
’جب تک تینوں بھائی باہر نہیں آئیں گے، کوئی جشن نہیں منائے گا‘، سنجے سنگھ کی ضمانت پر بیوی انیتا کا بیان

عام آدمی پارٹی کے رکن پارلیمنٹ سنجے سنگھ کو آج اس وقت بڑی راحت ملی جب سپریم کورٹ نے دہلی آبکاری پالیسی معاملے میں انھیں ضمانت پر رِہا کرنے کا حکم جاری کیا۔ اس خبر نے عام آدمی پارٹی (عآپ) کو بھی سکون کا احساس دلایا ہے اور سنجے سنگھ کی بیوی انیتا سنگھ کو بھی راحت ملی ہے۔ حالانکہ انیتا سنگھ نے اپنے شوہر کے ضمانت ملنے پر کسی بھی طرح کا جشن منانے سے انکار کر دیا ہے۔ انھوں نے اپنے بیان میں کہا ہے کہ ’’جب تک تین بھائی (اروند کیجریوال، منیش سسودیا اور ستیندر جین) باہر نہیں آئیں گے، کوئی جشن نہیں منائے گا۔‘‘

دراصل دہلی آبکاری پالیسی معاملہ میں ہی وزیر اعلیٰ کیجریوال، سابق نائب وزیر اعلیٰ منیش سسودیا اور سابق وزیر ستیندر جین بھی جیل میں قید ہیں۔ انیتا سنگھ نے ان تینوں کی رِہائی تک جشن نہ منانے کا فیصلہ کیا ہے۔ انھوں نے سنجے سنگھ کو ضمانت ملنے کے بعد میڈیا سے بات کرتے ہوئے کہا کہ ’’ابھی یہ جدوجہد طویل بہت طویل ہے۔ جب تک تینوں بھائی ہمارے باہر نہیں آتے، تب تک ہم کوئی جشن نہیں منائیں گے۔ عدلیہ کا بہت بہت شکریہ کہ انھوں نے ایک بڑی راحت دی ہے۔ آج وہ (سنجے سنگھ) باہر نہیں آئیں گے، کل تک آئیں گے۔‘‘

واضح رہے کہ سنجے سنگھ گزشتہ چھ ماہ سے جیل میں تھے۔ سپریم کورٹ میں ای ڈی نے آج ان کی ضمانت پر اعتراض نہیں کیا جس کے بعد سپریم کورٹ نے کہا کہ ان کی ضمانت منظور کی جاتی ہے اور ضمانت کی شرطیں ذیلی عدالت طے کرے گی۔ فی الحال سنجے سنگھ اسپتال میں داخل ہیں۔

Read More