آپریشن زندگی: اترکاشی ٹنل میں پھنسے 40 مزدوروں کو نکالنے کی جنگ جاری، بس کچھ گھنٹے کا انتظار!
امریکن آگر مشین لگاتار بورنگ کر ہیوم پائپ ڈال رہی ہے، ابھی تک 24 میٹر تک پائپ ڈالا جا چکا ہے اور امید ظاہر کی جا رہی ہے کہ کل کسی بھی وقت مزدور باہر آ سکتے ہیں۔
Through RSS Feeds 
اتراکھنڈ کے اترکاشی میں ٹنل کے اندر پھنسے 40 مزدوروں کی زندگی بچانے کی کوششیں آج چھٹے دن بھی جاری ہے۔ پھنسے ہوئے مزدوروں تک کھانا اور پانی کسی طرح پہنچایا جا رہا ہے جس سے انھیں بہت عافیت ہے۔ امید کی جا رہی ہے کہ ان مزدوروں کو ٹنل سے نکالنے کے لیے چلائے جا رہے ’آپریشن زندگی‘ کو کل کسی بھی وقت کامیابی مل سکتی ہے۔ یعنی کچھ گھنٹوں کے بعد مزدور کھلی ہوا میں سانس لے سکیں گے اور اپنے اہل خانہ کے ہمراہ گھر جا سکیں گے۔
میڈیا رپورٹس کے مطابق امریکن آگر مشین لگاتار بورنگ کر کے ہیوم پائپ ڈال رہی ہے۔ این ایچ آئی ڈی سیل ایل ٹنل پروجیکٹ ڈائریکٹر انشو منیش کھلکو کے ذریعہ دی گئی جانکاری کے طمابق فی الحال 24 میٹر تک پائپ ڈالی جا چکی ہے۔ ان کا کہنا ہے کہ جلد ہی ریسکیو ٹیم کے اراکین دوسرے سرے تک پہنچ جائیں گے اور مزدوروں کو بہ حفاظت باہر نکال لیں گے۔ دراصل ریسکیو ٹیم اور مزدوروں کے درمیان ملبہ کی 70 میٹر چوڑی دیوار حائل ہے جس میں پائپ ڈالنے کا عمل جاری ہے۔ جب ایک بار پائپ 70 میٹر چوڑی دیوار کو پار کر جائے گا تو ایک ایک کر دوسری طرف پھنسے مزدوروں کو باہر نکالا جائے گا۔
قابل ذکر ہے کہ اتراکھنڈ کے اترکاشی میں چار دھام پروجیکٹ کے تحت بن رہی ٹنل کی لمبائی تقریباً 4.5 کلومیٹر ہے۔ 12 نومبر کو صبح تقریباً 4 بجے کم و بیش 40 مزدور ٹنل کے 200 میٹر اندر کام کر رہے تھے۔ ٹھیک اسی وقت اچانک ٹنل کی مٹی بھربھراکر گر پڑی۔ مزدور جب تک کچھ سمجھ پاتے تب تک ان کے آگے تقریباً 60 میٹر ملبہ کی دیوار بن چکی تھی۔ بعد میں 10 میٹر کا ملبہ مزید گرا اور یہ دیوار 70 میٹر موٹی ہو گئی۔
